“Xocalı” operası təqdim olundu”- reportaj

Bəstəkarlar İttifaqında “Xocalı” soyqırımın  26-cı ildönümü ilə bağlı anım tədbiri keçirilib.

Muztv.az xəbər verir ki, tədbiri giriş sözü ilə açan Azərbaycan Bəstəkarlar İttifaqının sədri, Xalq Artisti Firəngiz Əlizadə bu faciənin xalqımızın bir parçası olduğunu, daim unutmamağı, eləcə də, Azərbaycan və xarici bəstəkarların həsr etdiyi əsərlərdən danışıb.

Daha sonra “Xocalı” operasının ilk təqdimatı keçirilib. Librettonun müəllifi Nurlana Hacıyeva, bəstəkarı isə Nazim Quliyevdir. Çıxış edən müəlliflər librettonun mahiyyətindən və əhəmiyyətindən söz açıblar.

Çıxışlar arası operadan üç hissə səsləndirilib. “Xocalının ariyası” Beynəlxalq müsabiqə laureatı Firuzə Nəcəflinin müşayiəti ilə Cavid Hüseynin ifasında dinlənilib.

Sonra “Xocalı və Ayalının dueti” Firuzə Nəcəflinin müşayiəti ilə Cavid Hüseyn və Jalə Kərimovanın ifasında səslənib.

Operanın sonuncu hissəsi “Ayalının ariyası” Firuzə Nəcəflinin müşayiəti ilə Jalə Kərimovanın ifasında tədbir iştirakçılarına təqdim olunub.

Xatırladaq ki, “Xocalı” faciəsi ilə bağlı silsilə tədbirlər ardıcıl olaraq keçiriləcək.

Bununla bağlı süjetə fevralın 27-də saat 19:00-da MUZ TV Azərbaycan kanalında efirə gedəcək “Muz Life” verilişində baxa bilərsiniz.

Lamiyə Balacayeva