Məşhurlar prezident seçkiləri ilə bağlı paylaşım etdilər

Xəbər verdiyimiz kimi, bu gün Azərbaycanda prezident seçkiləri günüdür.

Muztv.az xəbər verir ki, yerli məşhurlarımız bununla bağlı İnstaqram səhifələrində paylaşım ediblər. Belə ki, müğənnilər Sevda Yahyayeva, İzzət Bağırov, Sevil və Sevinc Səfərova bacıları, Əbdül Xalid, Rəqsanə İsmayılova, Günay İbrahimli və başqaları dövlət başçısı İlham Əliyevin fotosunu paylaşaraq ölkə prezitentimizə dəstək olublar.

Xatırladaq ki, bu seçkilərdə 8 nəfərin namizədliyi qeydə alınıb. Onlar prezidentliyə namizədliyi hakim Yeni Azərbaycan Partiyası tərəfindən irəli sürülən İlham Əliyev, namizədliyi Bütöv Azərbaycan Xalq Cəbhəsi Partiyası tərəfindən irəli sürülən Qüdrət Həsənquliyev, namizədliyi Azərbaycan Sosial Demokrat Partiyası tərəfindən irəli sürülən Araz Əlizadə, namizədliyi Milli Dirçəliş Hərəkatı Partiyası tərəfindən irəli sürülən Fərəc Quliyev, namizədliyi “Cəbhəçilərin təşəbbüs qrupu” tərəfindən irəli sürülən Razi Nurullayev, namizədliyi Müasir Müsavat Partiyası tərəfindən irəli sürülən Hafiz Hacıyev, öz təşəbbüsü ilə namizədliyini irəli sürən Zahid Oruc və namizədliyi Azərbaycan Demokrat Partiyası tərəfindən irəli sürülən Sərdar Məmmədovdur (Cəlaloğlu).