İran Milli Orkestri Bakıda çıxış edəcək

Azərbaycanda keçiriləcək İran Mədəniyyəti Günlərinin zəngin proqramı açıqlanıb. 

Muztv.az xəbər verir ki, iyunun 27-dən iyulun 1-dək baş tutacaq Mədəniyyət Günləri çərçivəsində İranın incəsənət ustalarının iştirakı ilə konsertlərin, sərgilərin təşkili, film və teatr tamaşalarının nümayişi nəzərdə tutulur. İran Milli Orkestri ilk dəfə olaraq Bakıda çıxış edəcək. Habelə müştərək İran-Azərbaycan kinosunun çəkilişinə başlamaq nəzərdə tutulur.

İran Mədəniyyət Mərkəzində mədəniyyət günlərinə həsr edilmiş mətbuat konfransında İran İslam Respublikasının Azərbaycandakı səfirliyinin Mədəniyyət Mərkəzinin sədri Əsğər Farsi deyib ki, mədəniyyət günləri iki ölkə arasında mədəni əməkdaşlığın inkişafına, incəsənət ustalarının və digər sənət adamlarının bir-birini daha yaxından tanımasına, sıx ünsiyyət qurmasına, İranın mədəni nailiyyətlərinin Azərbaycan sənətsevərlərinə təqdim edilməsinə, habelə təcrübə mübadiləsinin genişlənməsinə rəvac verəcək.

Mədəniyyət günləri çərçivəsində İran İslam Respublikasının mədəniyyət və islam irşad naziri Seyid Abbas Salehinin başçılığı altında tanınmış mədəniyyət və incəsənət xadimlərindən ibarət geniş tərkibli nümayəndə heyəti ölkəmizə səfər edəcək.