"Vicdan Haqqı"- nın aktrisası: "İtirməyi sevmirəm"

"Vicdan Haqqı" və "Qız atası" seriallarından sonra daha çox tamaşaçı kütləsi toplayan gənc aktrisa Ülviyyə Xəlilbəyli ATV telekanalında yayımlanan "Kulis" verilişinin qonağı olub.

Muztv.az xəbər verir ki, "Müəllif" rubrikasında sualları cavablandıran aktrisa maraqlı açıqlamalar edib. Xarakterindən şikayətlənən aktrisa sadəliyinin hər zaman başına bəla olduğunu deyib:

"Sadələyim həmişə başıma bəla olub, özümlə bacarmıram. Sadəliyimi qəlbi qara insanlar səhv anlayır. Onları çox vaxt görməzdən gəlirəm, amma daxilimdə əsəb olur, demək olar ki, yola verirəm. Amma mən öz səviyyəmi qoruduğuma görə kimsə məni yola verə bilməz. Bir sözlə, belə bir imkanı kiməsə yaratmıram. Dost-tanış dediyim insanlar da, bacı qədər yaxın bildiyim rəfiqələrim də var".

Həyatda onun üçün önəmli olan şeylərdən danışan aktrisa daha çox yaxınlarını itirməkdən qorxduğunu açıqlayıb:

"Ailə üzvlərim, sevdiyim insanlar buraya daxildir. Onlar mənim dost-tanış dediyim, iş yoldaşlarım, hətta xətrini çox istədiyim tələbə yoldaşlarım da ola bilər".

Hərdən istəməsə də, həyatında bəzi şeylərin monoton şəkildə getdiyini deyən Ülviyyə bunu dəyişmək üçün həmişə cəhd göstərdiyini qeyd edib:

"Həyatda heç vaxt "pas" demirəm, sona kimi mübarizə aparıram, çünki itirməyi sevmirəm. Amma çoxbilmiş də deyiləm, elə olsaydım, hərdən uduzmazdım da".

Daha çox seriallarda çəkilən Ü.Xəlilbəyli, filmlərdən də təkliflərin aldığını, amma hələ ki, özünə uyğun bir obraz olmadığına görə imtina etdiyini vurğulayıb. 

Ülviyyə Xəlilbəyli həyatda insanların onu həm ciddi, həm də çılğın obrazda görə biləcəklərini də vurğulamağı unutmayıb.