"Eurovision 2017" mahnı müsabiqəsinin qalibi məlum oldu - fotolar 

Ukraynanın paytaxtı Kiyevdə keçirilən 62-ci "Eurovision" mahnı müsabiqəsinin qalibi Portuqaliya təmsilçisi Salvador Sobral olub.

Muztv.az xəbər verir ki, Salvador yarışmada ifa etdiyi "Amar Pelos Dois" mahnısı ilə 758 xal qazanıb.

O, münsiflər tərəfindən 382, tamaşaçılar tərəfindən isə yenə də ən yüksək 376 səs toplayıb.

Azərbaycanı "Skeleton" mahnısı ilə 12-ci nömrə altında təmsil edən Diana Hacıyeva (Dihaj) isə münsiflər tərəfindən 78, tamaşaçılardan isə 42 səs alıb.

O, ümumilikdə 120 xal toplayaraq 26 finalist arasından 14-cü yerdə qərarlaşıb.

İtaliya və Portuqaliya münsif səsverməsində Azərbaycana 12 xal , Gürcüstan və Yunanıstan 10 xal , San-Marino, Moldova, Bolqarıstan  5 xal, Ukrayna 6 xal, Macarıstan və Belçika 4 xal, Albaniya 2 xal, İrlandiya, Kipr, Polşa isə 1 xal verib. 

Latviya, İsrail, Monteneqro, Malta, Makedoniya, Danimarka, Avstriya, Norveç, İspaniya, Finlandiya, Fransa, Litva, Estoniya, Ermənistan, İslandiya, Serbiya, Avstraliya, Almaniya, İsveçrə, Niderland, Belarusiya, Ruminiya, Sloveniya, Böyük Britaniya, Xorvatiya və Çexiya Azərbaycana "0" səs verib. 

Azərbaycandan 8 balı Portuqaliyaya, 10 balı Moldovaya, 12 balı isə Belarusa verilib.

Səsləri aparıcı Tural Əsədov təqdim edib.

İsveç tamaşaçılardan 126, İtaliya 200, Belçika 255, Moldova 264, Bolqarıstan isə 337 səs alıb.

Ümumi səsvermənin nəticəsinə əsasən, Bolqarıstan 615 xalla 2-ci, Moldova isə 374 xalla 3-cü yerdə qərarlaşıb.

Beləliklə ilk 10-luq belə sıralanıb:

1. Portuqaliya - 758
2. Bolqarıstan - 615
3. Moldova - 374
4. Belçika - 363
5. İsveç - 344
6. İtaliya - 334
7. Ruminiya - 282
8. Macarıstan - 200
9. Avstraliya - 173
10. Norveç - 158

Qeyd edək ki, Ermənistan 79 xalla 18-ci pillədə qərarlaşıb.

Birbaşa finala vəsiqə qazanan böyük 5-lik ölkələrdən İspaniya və Almaniya münsiflərdən 0 xal alıb. Almaniya tamaşaçılardan 6, İspaniya isə 5 səs alıb.

Nəticədə həmin ölkələr 25-ci və 26-cı sıraları bölüşüb.