Rafet El Romanın Bakı konserti baş tutmayacaq

Türkiyəli müğənni Rafet El Romanın Bakı konserti təxirə salınıb.

    Türkiyəli müğənni Rafet El Romanın Bakı konserti təxirə salınıb. Axşam.az-ın məlumatına görə bu haqda gecənin təşkilatçısı Nahid Emiloğlu açıqlama verib. O, dolların devalvasiyasının buna səbəb olduğunu deyib: “Xaricdən gələn müğənninin qonorarı dollarla ödənilir. Son günlər dolların məzənnəsinin yüksəlməsi işimizdə çətinlik yaratdı. Rafetin istədiyi qonorarı ödəyə bilmərik. Ona görə də konsert təxirə düşdü”. Qeyd edək ki, Rafet El Romanın konserti dekabrın 29-da Bakı Əyləncə Mərkəzində baş tutacaqdı.

    “Qala” qrupunun rəhbəri, müğənni-bəstəkar Ceyhun Əliyev Yeni ilə özəl fotosessiya etdirib. Sənətçi fotolarındakı “3 tuz”un mənasına da aydınlıq gətirib: “Üç tuz həyatımdakı önəmli məqamların göstəricisidir. Bu uğuru 2006-ci ildən, “Qala” qrupunun fəaliyyəti ilə başlamaq istəyirəm. Həm Ceyhun “Qala”sız, həm “Qala” Ceyhunsuz səslənmir. Bunun ardınca, yüz ölçüb, bir biçib evlilik qərarı verdim. Çox şükür, uğurlu alındı. Üçüncü tuzu övladımın dünyaya gəlişi tamamladı”.  C.Əliyev həmçinin şəxsi həyatını ekranlardan uzaq saxlaması haqqında da açıqlama verib: “Kim ailəsini göstərir şəxsi işidir. Amma mən bunu düşünmürəm. Dostlar arasında birgə görünürük, bu bizə bəs edir. Ümumiyyətlə, münasibətlərimizi tarazlamışıq. Ailə qurana kimi bir-birimizi yaxından tanıdıq. Mən bilirdim ki, kimin nəslindən qız alıram. Həyat yoldaşım da bilirdi ki, müğənni ilə ailə qurur. Ona görə də, tərəddüdlərimiz yoxdur”.

    Türkiyəli müğənni Özcan Dəniz, Röyanın "Dostumsan, ya sevgilim" mahnısını lentə yazdıracaq. Hətta Özcan qatıldığı tədbirlərin birində bəstəni canlı ifa edib. Gecce.az-in məlumatına görə, bu barədə mahnının müəllifi Hacı Nazim danışıb: "Röyanın ifa etdiyi "Dostumsan ya sevgilim" mahnısını Özcan Dəniz ifa etmək istəyir. Röyanın da bundan xəbəri var. Hətta Özcan özəl məclislərin birində ifa edərkən telefona da çəkiblər". Röya da öz növbəsində mövzu ilə bağlı fikirlərini bölüşüb:"Mənim üçün Özcan Dənizin mahnımı oxuması xoşdur. Bu haqda məlumatım yoxdur. Amma mahnıda sərhəd  olmadığını düşünürəm. Tərbiyəylə edərlərsə, ürəyimi də verərəm. Nazim mahnının bəstəkarıdır. Onun haqqı var ki, mahnısı daha populyar olsun. Özcan Deniz o mahnını nə qədər istəyir, oxusun. Onsuz da o mahnı mənimdir. Türkiyədə oxusun, amma Bakıda yox".

   Könül Kərimova evində toy etməyə hazırlaşır. Müğənni növbəti ildə qızını gəlin köçürəcəyini bildirib. Bunun həyəcanını yaşayan sənətçi arzusunu dilə gətirib: " Övlad toyu etmək ən böyük arzumdur. Qızımı köçürəcəm".

 

Nərminə Abbasova

 

Muz-Tv.az