Məşhurlar əsgərlərimizə dəstək oldular
Xalq artisti Faiq Ağayev qatıldığı verilişlərin birində son zamanlar Azərbaycan-Ermənistan sərhəddində baş verən döyüşlərdən danışıb.
Xalq artisti Faiq Ağayev qatıldığı verilişlərin birində son zamanlar Azərbaycan-Ermənistan sərhəddində baş verən döyüşlərdən danışıb. Axşam.az-ın məlumatına görə, xalq artisti şəhid ailələrinə başsağlığı verib: “Nə qədər ki, belə analar var, Azərbaycan torpağını qoruyacaq igid oğullar böyüyəcək. Çünki Ana tərbiyədir. Şəhid vermiş ailələrin qarşısında baş əyirəm. Çox yüksək əhval-ruhiyyə var. Arazın o tayından başlayaraq, dünyanın istənilən ölkəsində azərbaycanlılar ayağa qalxıb. Camaat cəbhə bölgələrinə gedir. Bu o deməkdir ki, Azərbaycan xalqının döyüş ruhu möhkəmdir. Biz sənət adamları, ictimaiyyətə tanış olan insanlar xalqımızın döyüş ruhunu, ruh yüksəkliyini təmin etməliyik. Sosial şəbəkələrdə də güclü Azərbaycan təbliğatı gedir. Bir çox ölkələr bizə dəstək çıxdı. Biz bir daha göstərdik ki, Azərbaycan xalqı istənilən halda səfərbər olub torpaq azad etmək uğrunda müharibəyə hazırdır”.
Faiq Ağayev sülh çağırışı edən həmkarlarının yersiz çağırışlarını sərt tənqid edib: "Mən bəzi insanlara müraciət etmək istəyirəm: Dırnaqarası sülh çağırışları edəndə canlarını itirmiş şəhidləri düşünün. Sülh barədə o vaxt danışarıq ki, Azərbaycan torpaqları qayıtsın, ərazi bütövlüyü təmin olunsun, daha sonra Azərbaycan vətəndaşı olan digər millətlərin nümayəndələri ilə söhbət edərik ki, sabahkı həyatımız necə olacaq. Təbii ki, hər bir müharibənin sonu sülhdür. Təbii ki, bir torpaqda yaşamaq məcburiyyətində olacağıq. Amma bunu indidən etməyi vətənini, torpağını satmaq kimi qiymətləndirirəm. Yalançı “pasifist” çıxışlar etməyin. Əfsus ki, bəzi həmkarlarım arasında da belə çıxış edənlər var. Yəqin cavandırlar, anlamırlar, 90-cı illərdən sonra anadan olublar, o dəhşətləri görməyiblər. Heç bir hadisədən xəbərləri yoxdur, dünyaya guya tolerantlıq, sülhpərvərlik nümayiş etdirirlər”.
PrimeTime.Az-a açıqlamasında Azərbaycanın xalq artisti Aygün Kazımova cəbhədə yaşananlara münasibət bildirib: "Allahım, sən bizim əsgərlərimizi, məmləkətimizi qoru. Son bir neçə gün ərzində Azərbaycanın igid oğulları şəhid oldu. Allah onlara rəhmət eləsin. Ailələrinə və Azərbaycanıma başsağlığı verirəm. Buna baxmayaraq, əsgərlərimiz igidlik nümayiş etdirib, bir neçə kəndi geri qaytarıb”.
Sənət aləminin taninmiş simaları cəbhə xəttindəki əsgərlərimizə dəstək üçün Tərtərə yola düşüblər. Axşam.az-ın məlumatına görə, prodüser Tolikin təşkil etdiyi bu ziyarətdə rəqqasə Fatimə Fətəliyeva, müğənnilər Elton Hüseynəliyev, Nadir Qafarzadə, Aysel Əlizadə, Sevil Səfərova, Zenfira İbrahimova və fotoqraf Cəlal Kəngərli yer alıb. Tolik “Siz sağ, biz salamat. Biz hamımız yola çıxmışıq” şərhini yazıb.
Canlı korifey,vətənpərvərlik mövzusunda yazılmış onlarla mahnının ifaçısı xalq artisti Mübariz Tağıyev cəbhədə yaşanan son hadisələrə münasibət bildirib. PrimeTime.Az-a danışan xalq artisti inanır ki, qüdrətli Azərbaycan ordusu tezliklə torpaqlarımızı düşmən tapdağından azad edəcək: "Ordumuzun güclü və qüdrətli olması bir azərbaycanlı kimi məni sevindirir. Biz mübarizəmizi sona kimi aparmağı bacarmalıyır. Düşmənlərimizə "Artıq yetər!" deməyin vaxtı yetişib. Görünən odur ki, işğal altında olan torpaqlarımız sülh yolu ilə alınan deyil. Yalnız və yalnız müharibə olmalıdır. Yoxsa bu iş çox uzanacaq. Mən ümid edirəm ki, Qarabağı bütünlüklə geri qaytara biləcəyik. Bütün əsgərlərimiz dözümlü və əzmkar olmağa,xalqımızı da onlara dəstək olmağa çağırıram. Allah şəhidlərimizə rəhmət eləsin. Tez bir zamanda qalib gəlib, onların ruhlarını şad edəcəyik. Ermənilər qəbul etməsələr də, geri çəkilməkdən başqa yolları yoxdur. Yaşasın, Azərbaycan Əsgəri!"
Azərbaycanın tanınmış sənətçiləri cəbhə bölgəsində baş verənlərə laqeyd qalmır, əsgərlərimizə dəstək olmaq üçün əlindən gələni edirlər.
Publika.az xəbər verir ki, bir çox sənətçilər və aparıcılar əsgərlərə hörmət əlaməti olaraq hərbi geyimdə çəkdirdikləri fotoları sosial şəbəkədə paylaşıb. Məşhurların bu addımı istifadəçilər tərəfindən müsbət qiymətləndirilib, həmçinin böyük ruh yüksəkliyi yaradıb.
Məşhurların hərbi geyimdə fotolarını təqdim edirik.
Xalq artisti, tanınmış aktrisa Firəngiz Mütəllimova sosail şəbəkə dostlarını diqqətli olmağa səsləyib. SHOW.AZ xəbər verir ki, aktrisa özünün “İnstagram” səhifəsində dostlarına çağırış edib: “Diqqətli olun. Erməni kəşfiyyatçıları Azərbaycan dilində profil açaraq doğma dilimizdə danışaraq bizdən məlumat yığırlar. Sonra da mətbuata ötürürlər. Nəyisə paylaşanda diqqətli olun. Dövlət sirləri, ordumuz və hərbi texnikamız barədə məlumat yaymayın. Bu, çox vacibdir. Bunu hər kəsə yayın, qoyun onlar da məlumatlı olsunlar”.
Azərbaycanın məşhur simaları əsgərlərimizə dəstək olublar. ATV.az-ın məlumatına görə, Videoçarxda Alim Qasımov, Aybəniz Haşımova, Brilliant Dadaşova, Akif İslamzadə, Faiq Ağayev, Sevda Ələkbərzadə, Tünzalə Ağayeva, Ədalət Şükürov, Vəfa Zeynalova, Aygün Səmədzadə, Miri Yusif, İlqar Muradov,Manana, Zamiq Hüseynov, Firuz Məmmədov, Ehtiram Hüseynov, Eldəniz Məmmədov, İlkin Əhmədov yer alıb.
Sevda Məmmədova
Muz-Tv.az