Lələ təpədə “Qarabağ şikəstəsi” səsləndirildi

Xanəndə Qoçaq Əsgərov və müğənni Elnur Məmmədov ötən gün ermənilərdən azad olunan Lələ Təpəyə gedib. 

    Xanəndə Qoçaq Əsgərov və müğənni Elnur Məmmədov ötən gün ermənilərdən azad olunan Lələ Təpəyə gedib. Axşam.az-ın məlumatına görə, əsgərlərlə görüşən ifaçılar “Qarabağ” və “Azərbaycanım” mahnılarını, “Qarabağ” şikəstəsini səsləndiriblər. Videolarını və fotolarını sosial şəbəkədə paylaşan E.Məmmədov düşmənə acıq verdiklərini bildirib:“Lələ Təpə zirvəsindəyik. Allah əsgərlərimizi qorusun, şəhidlərimizin ruhu şad olsun. Qarabağda “Qarabağ” şikəstəsi. Burada ermənilərə od qoyduq. “Qarabağ” mahnısını oxuyub, onlara od qoyurduq. Var olsun Azərbaycanın dəyərli əsgərləri”.

   Türkiyəli ifaçı Mehtap Demir azərbaycanlı şair Bəxtiyar Vahabzadənin şeirinə mahnı yazdırıb. “Haleyli (Ya nedir Allah)” adlanan bəstənin musiqisi İran xalq mahnısından götürülüb.  Mahnı Mehtap Demirin eyniadlı albomunda yer alıb. 

   Son günlər cəbhədə baş verən hadisələrə müğənni Sevda Yahyayeva da biganə qalmayıb. Əyninə əsgər geyimi, üzünə palçıq yaxan müğənni, kameralar qarşısında cəsur azərbaycanlı qızı obrazını yaratmağa müvəffəq olub. PrimeTime.Az-a açıqlama verən Sevda, layihə barədə açıqlama verib: "İlk dəfədir ki, vətənpərvərlik mövzusunda yaradıcı işimi gerçəkləşdirdim. Peşəkar fotoqraf Niko Abbasov tam istədiyim obrazı yaratmağın öhdəsindən məharətlə gəldi. Saç və makiyajım üzərində "İN Studio"nın zövqlü ustaları Qusik Simonla, İlhamə xanım çalışdılar. Maksimum çalışdıq ki, fotolarda vətənpərvərliyimizi nümayiş etdirək".

   Son günlər Ermənistan ordusu tərəfindən atəşkəsin pozulması və cəbhədə törətdikləri hərbi təxribatlara etiraz etmək məqsədilə İtaliyada yaşayan azərbaycanlılar da etiraz aksiyası keçiriblər.  İtaliya səfirliyi qarşısında keçirilən aksiyada tanınmış gənc müğənni Vaqif Nağıyev də iştirak edib.Müğənni sosial şəbəkədə sözügedən aksiyayla fotolar paylaşıb. Qeyd edək ki, Vaqif Nağıyev "Ukraynanın səsi" yarışmasında iştirak edib. 

 

Rəvan Nasiroğlu

 

Muz-Tv.az