Ceyhun Mirzəyevin 70 yaşı tamam olur

Aprelin 9-da aktyor, rejissor, görkəmli kino xadimi Ceyhun Mirzəyevin 70 yaşı tamam olur. 

    Aprelin 9-da aktyor, rejissor, görkəmli kino xadimi Ceyhun Mirzəyevin 70 yaşı tamam olur. O, 1946-cı ildə Ağdam rayonunun Abdal-Gülablı kəndində anadan olub. Azərbaycan Dövlət İncəsənət İnstitutunun rejissorluq fakültəsini bitirən  Ceyhun Mirzəyev, kinostudiyada müxtəlif peşələrdə çalışıb. Bununla yanaşı Mirzəyev Moskvada da təhsil alıb. Onun 48 illik ömrünün 35 ilə yaxını kino ilə bağlı olub. Çünki "Görüş" filmində Şıxəlinin oğlunun obrazını yaradanda cəmi 11 yaşı var idi. On iki yaşı olanda isə "Ögey ana"ya dəvət almışdı.

Assistent, rejissor köməkçisi aktyor və rejissor kimi filmlər çəkib. Aktyor "Mozalan" satirik kinojurnalı üçün süjetlər ərsəyə gətirib. Ceyhun Mirzəyev həm də güclü parodiyaçılıq qabiliyyətinə malik olub. Belə ki, o, bir dəfə söhbət etdiyi adamın səsini, danışıq formasını o dəqiqə yamsılamağı bacarırmış. Hətta "Mozalan"ın başlığında səslənən vızıltı səsi də ona məxsus olub. Ceyhun Mirzəyevin çəkdiyi və aktyor kimi çəkildiyi son film "Fəryad" olub. Qeyd edək ki, yaxın günlərdə Dövlət Film Fondunda Ceyhun Mirzəyevlə bağlı yubiley tədbiri təşkil ediləcək.

 

Sevda Məmmədova

 

Muz-Tv.az