Lalə Məmmədovanın paylaşımı qalmaqal yaratdı
Əməkdar artist Lalə Məmmədovanın cəbhə bölgəsinə gedib əsgərlər üçün konsert verən sənət dostlarını pisləməsi bir çoxlarını özündən çıxarıb.
Əməkdar artist Lalə Məmmədovanın cəbhə bölgəsinə gedib əsgərlər üçün konsert verən sənət dostlarını pisləməsi bir çoxlarını özündən çıxarıb. Axşam.az-ın məlumatına görə, müğənninin "Bu, Azərbaycan əsgərinə dəstək deyil. Bu, canını bizim uğrumuzda şəhid edənlərə və onların əzizlərinə hörmətsizlikdir. Səhər əsgər yoldaşını torpağa tapşıran əsgərin qol götürüb oynamasının adı nədir?" sözlərinə bir çox tanınmışlar fikir bildirib. Əməkdar artist Röya Ayxan L.Məmmədovanın bu ifadələrinə "Mən səninlə razıyam" deyə, şərh yazıb. Prodüser Tarix Əliyev (Tolik) hər iki əməkdər artistin fikirlərinə sərt münasibət bildirib: "Dünən bizi qınayırdılar ki, əsgərlərin yanına gediblər. Mən başa düşürəm insanlar toyu aylar əvvəl danışır. Biz də toydayıq. Amma şəkil, video paylaşmaq nəyə lazımdır? Hələ onlara "əjdahasan, supersən" yazanlar. Vətən dərdi çəkən heç olmasa getdiyi toyu gizlədər. Ay aman, şəkil qoymasalar, deyəcəklər toyu yoxdur".
Prodüser yazdığı "Lalə, sən də deyəsən, deputat olmaq istəyirsən. Rəfiqən də ad alıb, elə bilir sözü keçərlidir" fikirlərini daha sonra silib və bunun səbəbini açıqlayıb: "Bayaq yazdığım fikrimi sildim. Çünki istəmirəm kimisə reklam edim. Amma bunlar elə bilməsinlər ki, ulduzdular".
Müğənni Nadir Qafarzadə də məsələyə etirazını bildirib: "Lalə Məmmədova bizi cəbhə bölgəsində konsert verməkdə günahlandırır. Əvvəla biz bunu özbaşına etməmişik. Müdafiə, Mədəniyyət və Turizm Nazirliklərinin təşkilatçılığı ilə etmişik. Bəli, o cəbhə bölgələrinə mən də getmişəm. Biz heç də toy-bayram etmirik. Bir vətandaş olaraq, borcumuzu yerinə yetiririk. Biz orada sadəcə oxumurduq, həm də şəhid ailələrinə baş çəkib, əlimizdən gələni əsirgəmirdik. Döyüş bölgəsində düşmənlə üz-üzə dayanıb Azərbaycanın mahnı və muğamlarını ifa edərək, ermənilərə eşitdirirdik ki, bilsinlər biz göz yaşlarına qərq olmamışıq. Şəhidlər bizim üçün ölməyib, qəlbimizdə əbədi yaşayacaqlar. Gəlin bu günlərdə bir-birimizə dəstək olaq, ittiham etməyək. Mən də şəhid vermişəm. Doğma əmim nəvəsi Ramil Novruzov. Bu yara hamımızındır. Bu gün Azərbaycan əsgərinin diqqətə, qayğıya ehtiyacı var. Bəzi şeyləri yazmayacaqdım, amma məcbur edirsiniz. Mənəvi dəstəklə yanaşı, maddi dəstəyim də olub. İndi yazın ki, Nadir özünü reklam edir".
Rəqqasə Fatimə Fətəliyeva isə hər kəsi bir olmağa səsləyib: "Azərbaycanımızın bu günlərində hamıdan xahiş edirəm bir-birimizi qırmayaq, söz atmayaq. Bizim səhifələri ermənilər də izləyir. Kimsə nə isə edib və bunu səhv yozublarsa, buna göz yumaq. Axı bunu edən də azərbaycanlımızdır. Bu günlərdə sənət adamlarını tənqid etməyək". Qeyd edək ki, müğənnilər Nadir Qafarzadə, Ayaz Qasımov, Kərim Abbasov, Sevil Səfərova, Rəqsanə İsmayılova və rəqqasə Fatimə Fətəliyeva cəbhə bölgəsində konsert verib.
Aprelin 15-dən 17-dək Sinqapurda "Esplanade" teatrında "Müqəddəs musiqi qobeleni" adlı beynəlxalq konsert keçiriləcək. Bu konsertdə dünyanın müxtəlif ölkələrindən, o cümlədən Azərbaycan və Türkiyədən musiqiçilər və incəsənət nümayəndələri iştirak edəcək.
Aprelin 17-də "Esplanade" teatrında Azərbaycanın dünya şöhrətli xanəndəsi, xalq artisti Alim Qasımovun çıxışı baş tutacaq. O, qızı Fərqanə ilə birlikdə "Odlar yurdundan səslər:Azərbaycan muğamları və aşıqları" adlı konsert proqramı ilə çıxış edəcək. Qasımovlar klassik Azərbaycan xalq musiqisi - muğam ifa edəcək.
Azərbaycanın bir qrup mədəniyyət və incəsənət ustaları “N” saylı hərbi hissələrin birində əsgər və zabitlərlə görüşüblər. Bu barədə müğənni Ceyhun Əliyev məlumat verib: "Əsgər və zabitlərimizə dəstək olmağı özümüzə borc bildik. Onlarda ruh yüksəkliyini, torpaqların işğaldan azad olunması üçün hazır olduqlarının şahidi olduq. Konsert proqramı ilə çıxış etməyi düşünürdük. Amma şəhid xəbəri gəldiyi üçün musiqini dayandırdıq. Müdafiə Nazirliyinin təşəbbüsü ilə şəhid ailələrinə baş çəkdik, onların dərdinə şərik olduq. Arzu etdik ki, işğal altında olan digər torpaqlarımız azad olunsun və biz zəfər marşını Qarabağda çalaq. Hər bir əsgərimizi Allah qorusun. Onlara gecə-gündüz dua edirik. Hər birinin əlini bərk-bərk sıxıb, onlarla qürur duyduğumuzu bildirdik".
Sevda Məmmədova
Muz-Tv.az