İnqrid Bakıda təqdimat etdi

Məşhur italyan müğənnisi İnqridin Bakıda mətbuat konfransı reallaşıb.

   Məşhur italyan müğənnisi İnqridin Bakıda mətbuat konfransı reallaşıb.Sənətçi Azərbaycanda hazırladığı “Ümid yağışı” adlı albomunu media nümayəndələrinə təqdim edib: “Çox fəxr edirəm ki, bu layihədə iştirak edirəm. Bu layihəyə iki il bundan əvvəl başlamışıq. Mən burada ilk dəfə Vaqif Nağıyevlə “Ümid yağışı” mahnısını ifa etmişəm. Bildiyiniz kimi Vaqif “Ukraynanın səsi” yarışmasında ikinci yeri tutmuş bir insandır. Həddindən artıq bacarıqlıdır. Onunla ilk işimiz bu mahnı ilə başladı. Onun da nəticəsində biz bu albomu hazırladıq. Albom Azərbaycan dilində olan mahnılardan ibarətdir. Buradakı musiqilər mənə emosiya verir və İtaliyanın klassik mahnılarını xatırladır”.

   Albomdakı mahnıların musiqiləri Alxanlı, sözlər Gövhər Həsənzadə, aranjiman Yaşar Baxış, bek-vokal isə Samir Əsədova məxsusdur. Azərbaycan, ingilis, italyan və fransız dilində ifa olunan mahnılar sırasında İnqridin Azərbaycan dilində səsləndirdiyi “Sarı gəlin” ifası özəlliklə yer tutur. Sənətçi elə mətbuat konfransında “Sarı gəlin”i canlı ifa edərək öz fikirlərini bölüşüb: “Ümumiyyətlə albomun daxilində iki-üç mahnı var ki, çox gözəl alınıb. Bundan bəstəkar da razı qalıb. “Sarı gəlin”ə klip çəkdirməyi düşünürük. Bu albom böyük potensiala malikdir və düşünmürük ki, ancaq Azərbaycanla məhdudlaşsın, digər ölkələrdə də çıxartmağı planlaşdırırıq”. Sənətçi albomla kifayətlənməyib azərbaycanlı pərəstişkarlarına konsert də verəcək. O, mayın 26-sı sevənlərinin qarşısında çıxış edəcək.

 

Sevda Məmmədova

Çingiz Abdullayev

 

Muz-Tv.az