Afaq Bəşirqızının səhhətində irəliləyiş var

Xalq artisti Afaq Bəşirqızı Musiqili Teatrda baş tutan mükafatlandırma mərasiminə qatılıb. 

   Xalq artisti Afaq Bəşirqızı Musiqili Teatrda baş tutan mükafatlandırma mərasiminə qatılıb. Axşam.az-ın məlumatına görə, aktrisanın xeyli arıqlaması diqqət çəkib. Bir müddət əvvəl onurğa sütununda problem olan A.Bəşirqızı səhhətinin yaxşı olduğunu deyib. O, bildirib ki, müalicələri davam edir. Aktrisa sentyabrdan teatra qayıdacağını vurğulayıb.

   Xalq artisti Məleykə Əsədova qızı və bacısı ilə istirahətə yollanıb. Naxçıvanda dincələn aktrisa fotolarını sosial şəbəkədə paylaşıb. Batabat gölü ətrafında gəzən M.Əsədova təəssüratlarını da bölüşüb. O, “Allah hər kəsin gözəl arzularını həyata keçirsin. Naxçıvan şəhəri çox gözəldir, insanları ondan da yaxşıdır. Batabatda piknik, uşaqlığım yadıma düşdü. Ən çox sevdiyim əyləncəm ağaca çıxmaq idi. Qəlbi pisliklə, paxıllıqla dolu olan insanlarla Allah özü bilsin. Qəlbi gözəl hisslərlə döyünən insanları isə qorusun” deyə, bildirib.

   Əməkdar artist Manana “Sevgimizin dənizində” adlı yeni mahnısını təqdim edib. Bəstənin musiqisi Givi Usanaşviliyə, sözləri Leyli Erola məxsusdur. 

   Müğənni Səidə Sultan burun əməliyyatı etdirmək istəyir.Sənətçi bu haqda açıqlamasında deyib. O, son günlər nəfəs almada əziyyət çəkdiyini bildirib:“Heç vaxt estetik əməliyyat etdirməmişəm. Burnumda ət var, son günlər nəfəs almamda problem yaranıb. İstəyirəm əməliyyat etdirim. Həmişə əməliyyatdan qorxmuşam. Nəfəsimdəki bu problem oxumağıma da mane olur. Bilirəm ki, ürək üçün də ziyandır”.

 

Əhəd Miriyev

 

MuzTv.az