Vaqif Mustafazadənin xatirə gecəsində yaşananlar - fotolar 

Heydər Əliyev Sarayında görkəmli bəstəkar və pianoçu Vaqif Mustafazadənin xatirəsinə həsr olunmuş konsert proqramı reallaşıb.

Muztv.az-ın məlumatına görə, bir çox tanınmış və gənc ifaçıların yer aldığı konsertdə V.Mustafazadənin müəllifi olduğu əsərlər səsləndirilib.

İlk olaraq səhnəyə əməkdar artist Akif Süleymanbəyli çıxaraq rəhbərlik etdiyi orkestrlə birgə "Bakı" mahnısını ifa edib. Daha sonra o, Teymur Süleymanbəyli ilə "Əhməd haradadır" filmindən musiqi səsləndirib.

Gecədə iştirak edən xalq artisti Faiq Sücəddinov də V.Mustafazadə ilə bağlı təəssüratlarını bölüşüb:

"Vaqif birinci olmasa da, Azərbaycan üçün novator idi, musiqimizə yenilik gətirib. Bu gün onun üçün "Xatirələr" əsərini səsləndirəcəyəm".

Əməkdar İncəsənət Xadimi Cavan Zeynallı da bu tədbirə qatılmaqdan böyük məmnunluq duyduğunu deyərək ifaları ilə gələn qonaqları əyləndirib. Daha sonra yer 2 saylı uşaq incəsənət məktəbinin şagirdlərinə verilib və onlar bəstəkarın müxtəlif əsərlərini səsləndirərək konsert izləyicilərinə əsl musiqi ziyafəti yaşadıblar.

Tədbirin iştirakçılarından olan gənc ifaçı Nəzrin Zərbəliyeva isə əcnəbi musiqi ilə yanaşı, Teymur Süleymanbəylinin bəstəsini səsləndirib.

Gecədə Azad Şabanov, "Səs Azərbaycan” müsabiqəsinin qalibi Emiliya Yaqubova, Hüseyn Abdullayev, Natavan Cəbizadə, Tofiq Həsənsoy, "Aysel" rəqs qrupu və digərləri də çıxış edib.

Tədbir Faiq Sücəddinovun "Vətəndən pay olmayır" mahnısı ilə sona çatıb. 

Fotolar: 

Elkin Askerov