Məşhurlar İnstaqram hesablarını necə qoruyur? - sorğu

Yerli məşhurlar müğənni Eldar Qasımovun İnstaqram səhifəsinin erməni hakerlər tərəfindən oğurlanmasına münasibət bildirib.

Məşhurlar muztv.az-a açıqlamasında müğənninin belə bir halla üzləşdiyi üçün məyus olduqlarını söyləyib. Tanınmışlar bu tip hallarla rastlaşdıqda hansı üsullardan istifadə etdiklərini də açıqlayıblar.

Aparıcı Afaq Gəncəli İnstaqram səhifəsini qorumaq üçün heç bir tədbir görmədiyini söyləyib:

“Belə bir hadisə ilə mən də üzləşdim, mütəxəssislərə müraciət etdikdən sonra səhifəmi geri qaytardıq”.

Müğənni Abbas Bağırov daha öncə onun da İnstaqram səhifəsinin şifrəsini qırmağa çalışdıqlarını deyib:

“Ehtiyatlı olmaq lazımdır. Şifrəni elə qoymaq lazımdır ki, heç kim müdaxilə edə bilməsin. Bir dəfə mən də bu halla üzləşmişəm, amma tez kodu dəyişərək qarşısını almışam. Elektron ünvanımı da mütəmadi olaraq yoxlayıram”.

Müğənni Ayaz Qasımov isə İnstaqram səhifəsi üçün heç bir təhlükəsizlik tədbiri görmədiyini deyib:

“Belə bir hadisə mənim başıma gəlməyib, ancaq şifrəmi tez-tez dəyişirəm, gördüyüm yeganə tədbir budur, mail adressimi arada yoxlayıram. Amma düşünürəm ki, haker hücumu olarsa, şifrə dəyişməyin də bir o qədər xeyri olmayacaq. Səhifəmi rəsmiləşdirməmişəm”. 

Sevda Yahyayevanın prodüseri Pərviz Əsgərov da məsələyə münasibət bildirərək ciddi tədbirlər gördüklərini deyib:

“Sevda xanımın səhifəsi 2 aydır rəsmiləşdirilib. Amerikada bu işlə məşğul olan dostlarımız var, onların tədbirləri sayəsində səhifə ələ keçirilə bilməz. Hər hansı problem yarandıqda dərhal həll edirlər. Kənar müdaxilələr mümkün deyil”.

İfaçı Günay İbrahimli də İnstaqram hesabını rəsmi qeydiyyatdan keçirərək qoruyan məşhurlar siyahısındadır: 

“Səhifəm rəsmiləşdirilib, İnstaqram özü mənim hesabımı qoruyur”.